Katrín Sigríður
Júlíu Steingrímsdóttir

Efnahagsmál

Besta leiðin til að koma böndum á verðbólgu og háa vexti er innganga í ESB og upptaka evru.

Við eigum að hefja þá vegferð án tafar en þangað til þurfum við að beita öðrum ráðum til að tryggja stöðugleika í efnahagsmálum.

Heilbrigðismál

Aðgengi að heilbrigðisþjónustu er lykilatriði.
Það á ekki að skipta máli hvort það sé ríkið eða einkaaðili sem veitir hana.

Bygging nýs Landspítala skiptir verulegu máli en við megum ekki slá öllum umbótum á frest þar til nýr spítali er tekinn í notkun. Bregðast þarf strax við vanda á t.d. bráðamóttöku með afgerandi hætti.

Fæðingarorlof og dagvistun

Fæðingarorlofsmál eru í ólestri og verðandi foreldrar eiga ekki að þurfa að vera á milli ótta og vonar vegna tekna.

Hækka þarf greiðslur, bjóða upp á valkvæða lengingu og sveigjanleg skilyrði.

Skapa þarf lausn á dagvistunarvandanum í nánu samstarfi við sveitarfélögin í eitt skipti fyrir öll.

Útlendingamál

Stjórnvöld þurfa að tryggja fullnægjandi móttöku umsækjenda um alþjóðlega vernd, en ekki halda þeim í óvissu um langa hríð. Mannúð og skynsemi þurfa að ráða för í þessum málum.

Innflytjendur auðga íslenskt samfélag og við þurfum að halda rétt á spilunum í málaflokknum, auka möguleika til inngildingar og greiða aðgengi að atvinnuleyfum.

Menntamál

Standa þarf með kennurum og byggja upp virðingu fyrir því mikilvæga starfi sem á sér stað í grunn- og leikskólum landsins.

Það voru mistök á sínum tíma að stytta framhaldsskólann niður í þrjú ár og það þarf að endurskoða skipulag skólastigsins með námið og velferð nemendanna í huga.

Auðlindamál

Kvótakerfið virkar vel til að vernda fiskistofna og auka arðsemi en tryggja þarf að þessi auðlind sé í eigu þjóðarinnar, ekki einstaklinga.

Tryggja þarf að auðlindir Íslands nýtist þjóðinni allri, séu sjálfbærar til lengri tíma og að nýting þeirra stuðli að bættum efnahag og bættu atvinnulífi út um allt land.